Money Ginius

【背遊達人】自由行歐遊,廉航、火車、巴士點樣揀至抵?

gini | November 19, 2018

難得儲好長假,再坐十幾小時,飛去歐洲,當然想貪心啲,一次過,去多幾個國家玩!歐洲跨境方便,travel-friendly。咁到底,跨境交通(廉航、火車、長途巴士)點樣揀,先至價錢最平?最慳時間?最舒服?最抵坐呢?馬上和大家分析大比拼!

 

1/ 價錢最平?

一般情況,旅遊巴士,價錢最低。其次是廉航,最貴是火車。很多朋友都驚訝,原來在歐洲,坐長途火車會比坐飛機貴!?

以最熱門路線為例,倫敦去巴黎,坐廉航單程 HKD$400-1,000、火車 HKD$600-2,000,但長途巴士只需 HKD$160-400,慳咗幾餐飯有多!

而且,歐洲長途巴士公司發展成熟,選擇眾多,競爭激烈,不時推出大劈價,最誇張 1歐車票由 A國首都去 B國首都,雖然不一定搶到,但總算一個機會。巴士的劈價優惠,也比火車、廉航常見。

 

2/ 最慳時間?

圖片由作者提供

世事有時好公平,有辣、有唔辣。火車雖然最貴,但一般來說,最快。飛機看似速度最快,但加埋往返機場(至少一小時車程)、安檢、起飛降落、等行李,搞大半日唔誇張。但如果距離遠,例如玩完英國,想玩埋希臘,咁唔駛諗,一定坐飛機最快!

而坐巴士,雖然車速最慢,但勝在上車、落車都直達市中心核心內圍。加上有「通宵過夜」班次選擇,識得揀,都可以慳好多時間!

再用倫敦往巴黎為例,坐 Euro Star,車程 3小時。坐飛機,機程 1小時,但前前後後等候時間,合共 5-6 小時。坐巴士,的確要 7-8小時,但如果,挑戰凌晨過夜班次,在倫敦食埋晚飯,玩到 11pm 先上車,瞓一覺,第二朝 7am 直達巴黎市中心,落車即可掃貨 Shopping,連一晚住宿都慳返,也更慳時間!

再講,火車、機票貴幾倍,如果不幸 delay(時有發生),就賠了夫人又折兵。

3/ 最舒服?

圖片由作者提供

要比拼座位寛闊度,火車,又贏一仗!畢竟火車票貴好幾倍喔!其次,是長途巴士,歐洲人普遍有公德心,車廂清潔乾淨、座位 Leg Room 對亞洲人來說綽綽有餘。相反,廉航座位更窄。

咁當然,廉航再逼,都只是坐 1-2小時;但長途巴士動輒 3-5小時(我最長一程,由烏克蘭坐到俄羅斯,20小時),如果難以忍耐坐長途車,巴士就未必是你的選擇了。

 

總結/ 火車、廉航、巴士,邊個最抵坐?

老土啲講,答案人人唔同,甚至段段旅程,也不盡相同。如果請爸媽舒舒服服歐遊,十日去八國,旨在帶爸媽看名勝,不介意花多一點錢,火車當然是最佳選擇;如果係畢業旅行、裸辭散心,窮遊 2-3個月,時間充裕,長途巴士當然是最慳錢選擇;如果玩嘅國家,距離較遠,想由東歐跳去西歐,飛機絕對最慳時間。

 

寫呢篇文章,不旨在「填鴨式」餵食一個固定答案。反而,我想分享以下幾個簡短步驟,希望讀者自行計算,每一趟旅程,屬於你自己的最佳答案:

  1. 了解各款跨境交通工具的好處、壞處。
  2. 了解自己的旅行節奏(爭分奪秒?無需太趕?)
  3. 了解自己的荷包(寧願 buy time?寧願慢慢摵?)
  4. 了解自己的捱苦耐力(旅行寧願求舒服?窮遊唔介意頂硬上?)
  5. 用 skyscanner 查機票、Rome2Rio 查火車、巴士票價格
  6. 登入個別廉航、火車、巴士公司網站,了解額外優惠、最低價格、班次選擇

 

希望以上 Check List 和好壞大比拼,可以提供到多一啲線索,幫大家計算出自己行程的最抵選擇!

 

作者:

廚職背遊 梁芷靈

廚職背遊 460日:何文田坐車到新加坡、德國工作假期、希臘坐車返香港、西伯利亞鐵路。《經濟通》DIVA Channel、《gini》智能理財平台專欄作者。曾赴英國留學、英國廣播公司工作。下個計劃:去英國做老闆!

Comments